God werk in ons om deur ons te kan werk
Fil 2:12-30
Hier word daar verder aandag gegee aan die gelowiges in Filippi om hulle aan te spoor om die Christus gesindheid prakties toe te pas en uit te lewe. Dit kan nie gedoen word deur dit na te boots nie, maar deur die wete dat God in ons werk om dit moontlik te maak – en dan sal dit uitwerk in die praktyk.
1. Werk uit (v12)
“…werk julle eie heil uit met vrees en bewing;”
Die gelowige moet self volle gebruik maak van dit wat God vir hom gedoen en tot sy beskikking gestel het – nml. Om uit te werk wat God ingewerk het. Dit wat God in ons werk en doen moet ons gehoorsaam, noukeurig, eerbiedig en dankbaar laat uitwerk na ander.
Met “vrees en bewing” – m.a.w. gehoorsaam en eerbiedig.
“Sonder murmirering en teespraak” (v14) – m.a.w. oorwinnend en gewillig.
→ Dit is die gesindheid waardeur dit gedoen moet word.
Die doel en resultaat van so ‘n gesindheid is duidelik in vers 15 “sodat julle onberispelik en opreg kan wees, kinders van God sonder gebrek te midde van ‘n krom en verdraaide geslag onder wie julle skyn soos ligte in die wêreld,”
2. Werk in (v13)
“want dit is God wat in julle werk om te wil sowel as om te werk na sy welbehae.”
God werk die wil, drang en begeerte in ons om te werk na Sy welbehae. Hy gee ook vir ons die krag om dit te kan doen. Dit wat God in ons werk is Goddelike genade en dit wat ons deur Sy krag en instaatstelling uitwerk na ander mense is ons menslike verantwoordelikheid.
God verander ons en skaaf aan ons sodat ons ‘n seën vir andere kan wees en mense kan bereik vir Sy Koninkryk.
3. Hou vas aan die Woord (v16)
“deurdat julle die woord van die lewe vashou…”
Dit is die voorskrif en belofte van God. Deur Sy woord deel God Sy lewe aan ons mee, vernuwe dit voortdurend en hou dit in stand. God eer altyd Sy woord. Die openbaring van God aan ons deur Sy woord is nie alleen God se metode nie, maar dit is vir ons altyd die veiligste, omdat die duiwel miskien nog die woord kan probeer verdraai, maar hy kan dit nie verander of tot niet maak nie. Christus was God se laaste en finale ‘Woord’ aan die wêreld (Heb. 1:1,2 “Nadat God baiekeer en op baie maniere in die ou tyd gespreek het tot die vaders deur die profete, het Hy in hierdie laaste dae tot ons gespreek deur die Seun wat Hy as erfgenaam van alles aangestel het, deur wie Hy ook die wêreld gemaak het.”) Hou vas aan Jesus.
4. Hierdie Gesindheid (v5)
“Want hierdie gesindheid moet in julle wees wat ook in Christus Jesus was.”
Hierdie gesindheid kan nie nageboots word nie. Dit is ‘n deel van ‘n mens se innerlike wese, ‘n bewys en weerspieëling van jou innerlike verhouding met God. Alleen die Heilige Gees kan die ware, egte gesindheid van die Here Jesus bewerk in die hart en lewe van ‘n sondige, opstandige sondaar.
As GETUIES dat hierdie veranderde gesindheid moontlik is in ‘n mens, verwys Paulus net kortliks na homself in vers 17 (“Maar al word ek as ‘n drankoffer uitgegiet oor die offer en bediening van julle geloof, verbly ek my, ja, verbly ek my saam met julle almal;”), en gaan dan voort om vir Timotheüs en Epafroditus as menslike voorbeelde te gebruik dat dit wel moontlik is om hierdie gesindheid in ons te kan hê.
- Timot heüs – se opregte, onselfsugtige, beproefde gesindheid as dienaar van die evangelie en ‘n dienskneg van ander word baie duidelik beskryf in vers 19 tot 23. Paulus het hierdie getroue jong man as sy kind in die geloof beskou en hom as een van sy medewerkers gekies terwyl hy op sy tweede sendingreis was (Hand. 16:1-4), nadat hy homself bewys het in sy eie gemeente en omgewing. Hy was in hierdie krisis tyd nog steeds by Paulus, gereed en gewillig om deur hom sestuur te word (v23).
- Epafroditus (v25) – was Paulus se ‘broeder’ en medewerker en medestryder. Hy was ‘n baie goed gebalanseerde Christen, belas met ander mense en deur God geseën en geëer. Sy gesindheid teenoor Paulus word weerspieël deurdat hy so vêr gereis het om hom op te soek en te dien met die offergawe van die Filippense. Dit word bereken dat sy heen en weer reis ongeveer 1600km was. Hy het moontlik op diè lang pad so dodelik siek geword (v26-27). Sy gesindheid teenoor andere was ook duidelik deurdat hy besorg was omdat ander oor hom besorg en bekommerd was toe hulle gehoor het dat hy siek was (v26). In vers 30 sê Paulus dat Epafroditus die werk van Christus gedoen het.
Ons moet God toelaat om in ons te werk. Hierdie voorbeelde wys ons dat dit moontlik is. Ons moet bid dat die Here ons harte en gedagtes sal verander en om aan ons te skaaf. Dit berei ons voor vir die werk wat Hy vir elkeen in gedagte het – om siele te win.
deur Madelein Wolfaardt